Prokuroria Themelore e Prizrenit ka ngritur aktakuzë ndaj ish kryetarit të Suharekës, Sali Asllanaj, për keqpërdorim të pozitës zyrtare gjatë kohës që ishte në detyrë. Aktakuzat janë ngritur edhe ndaj të pandehurve në cilësinë e drejtorit të Drejtorisë Komunale të Arsimit në Suharekë, Sherif Berisha dhe drejtorit të SHFMU “Bajram Curri” në fshatin Nishor, Milazim Hajdari, shkruan Indeksonline.
“Prokuroria Themelore në Prizren – Departamenti i Krimeve të Rënda, ka ngritur aktakuzë kundër të pandehurve S.A, në cilësinë e kryetarit të Komunës së Suharekës, SH.B, në cilësi të drejtorit të Drejtorisë Komunale të Arsimit në Suharekë, dhe M.H, në cilësi të drejtorit të SHFMU “Bajram Curri” në fshatin Nishor, Komuna e Suharekës, për shkak se kanë kryer secili veç e veç veprën penale “Keqpërdorim i pozitës apo autoritetit zyrtar”, nga neni 422, paragrafi 1 të Kodit Penal të Republikës së Kosovës.
Sipas aktakuzës, të pandehurit dyshohen se duke e shfrytëzuar pozitën zyrtare, i tejkalojnë kompetencat e tyre me qëllim të përfitimit të çfarëdo dobie për personin tjetër, lidhur me Marrëveshjen për Mirëkuptim dhe Bashkëfinancim ndërmjet Komunës së Suharekës dhe OJQ-së “Kosovo Hope” për projektin “Transporti i nxënësve”, duke shkelur Ligjin e Prokurimit Publik nr.04/L-042, Ligjin për menaxhimin e financave publike nr.03/L-048, si dhe Rregulloren financiare nr.01/2013, me ç’rast i shkaktojnë dëm buxhetit të Kosovës në shumën totale prej 10.556.00 €”, thuhet në njoftim.
