Ka përfunduar pa fitues derbi italian i xhiros së 12-të në Seria A, ndërmjet AC Milanit dhe Interit.
Dy skuadrat zhvilluan ndeshje shumë të mirë ofensivë, por në fund rezultati përfundimtar doli të jetë 1 – 1, shkruan lajmi.net.
Hakan Çalhanoglu fitoi penallti, të cilën e konkretizoi vetë pas vetëm 11 minutave lojë dhe me pas festoi ndaj ish skuadrës (11′).
Por, gëzimi i Inter zgjati vetëm gjashtë minutave, ngase goditja e Fikayo Tomorit u devijua nga De Vrij dhe përfundoi në portën e “Neurazzurëve” (17′).
Pas vetëm 10 minutave, Inter kishte një tjetër rast të artë që të rikthente epërsinë, por Lautaro Martinez dështoi nga pika e bardhë (27′).
Dy skuadrat tutje zhvilluan super lojë, shumë ofensivë në përpjekje për të ndërtuar aksione ose të përfitojnë nga kundëraksionet, mirëpo rezultuan të pasuksesshme.
“Rossonerët” rrezikuan më shumë, por fati ishte nga ana e mysafirëve që vazhdonin të shpëtonin në fund.
Kështu, dy rivalët e përbetuar lokal, ndanë nga një pikë, derisa mbesin në garë për titull.
Milan mban pozitën e dytë me 32 pikë, aq sa ka lideri Napoli, derisa Inter zë vendin e tretë me 25 sosh.
