Dhjetë njerëz kanë vdekur dhe dhjetëra të tjerë janë lënduar pasi një ndërtesë e papërfunduar u shemb në Iranin jugperëndimor, bëri të ditur Kryqi i Kuq iranian, njofton të martën BBC-ja.
Ekipet e shpëtimit punuan gjatë natës për të tërhequr dhjetëra të bllokuar ende në bllokun 10-katësh të zyrës Metropol në Abadan.
Pamjet tregonin se dyshemetë e betonit dhe trarët prej çeliku kanë rënë në rrugë poshtë, duke shtypur disa makina.
Zyrtarët thanë se shkaku i shembjes po hetohet.
Ata që mbetën të bllokuar në ndërtesë për orë të tëra janë shpëtuar dhe dërguar në spital, tha një guvernator rajonal për agjencinë shtetërore iraniane të lajmeve, Irna.
Prokurori lokal, Hamid Maranipour tha se pronari i Metropol dhe kontraktori i ndërtesës janë arrestuar.
Irna raportoi se ndërtesa ndodhej në rrugën tregtare më të frekuentuar të Abadan-it dhe se katet e poshtme të saj ishin hapur për disa ditë, ndërsa punimet e ndërtimit vazhdonin sipër.
Kryqi i Kuq iranian tha se 23 ekipe shpëtimi nga Abadan dhe qytetet fqinje nxituan në vendngjarje së bashku me disa ambulanca.
Fillimisht kishte frikë se të paktën 80 persona kanë mbetur të bllokuar në rrënoja, por pas disa orësh numri i të zhdukurve u ul. /koha
