Uashington, 2 korrik – Presidenti amerikan Donald Tramp një ditë prejse Teherani kumtoi se e ka tejkaluar nivelin e dakorduar të rezervave të uraniumit të pasur, deklaroi se Irani “luan me zjarr”.
Ai shtoi se nuk ka çka të deklarojë për vendimin e fundit të Iranit.
Shtëpia e Bardhë edhe më parë ka reaguar në njoftimin iranian për tejkalimin e nivelit të dakorduar të uraniumit të pasur duke theksuar se “SHBA-ja dhe aleatët e tyre asnjëherë nuk do të lejojnë Irani të zhvillojë armë bërthamore”.
Irani dje kumtoi se e tejkaloi kufirin e rezervave të uraniumit të pasur të dakorduar me marrëveshje multilaterale në vitin 2015.
Irani u kërcënua edhe se më 7 korrik do ta rrisë pasurimin e uraniumit deri te niveli i lejuar për përpunimin e armëve bërthamore.
Shefi i Diplomacisë iraniane Mohamed Xhavad Zarif dje konfirmoi se Irani e tejkaloi kufizimin prej 300 kilogramë të uraniumit të pasur.
Irani, me marrëveshjen që në vitin 2015 e nënshkruajti me SHBA-në, Rusinë, Kinën, Britaninë e Madhe, Francën dhe Gjermaninë, u obligua ta kufizojë aktivitetin për pasurim të uraniumit, ndërsa për kthim i ishte premtuar heqje e sanksioneve ndërkombëtare.
Tramp vitin e kaluar e tërhoqi SHBA-në nga Marrëveshja dhe vendosi sanksione plotësuese ndaj Iranit. Teherani zyrtar kërkoi nga vendet tjera nënshkruese të Marrëveshjes ta mbrojnë Iranin nga sanksionet amerikane, ndërsa në të kundërtën paralajmëroi se nuk do t’i bashkangjitet marrëveshjes.