Një deputet i Vetëvendosjes dhe një tjetër i Nismës do të gjykohen për hedhje të gazit lotsjellës në seancat e Kuvendit.
Ismajl Kurteshi nga Vetëvendosje dhe Haxhi Shala nga Nisma do të gjykohen për hedhje të gazit.
Gjykata e Apelit të Kosovës i ka refuzuar ankesat e avokatëve mbrojtës të dy deputetëve duke lënë në fuqi kështu aktvendimin e Gjykatës Themelore të Prishtinës.
Themelorja në Prishtinë kishte refuzuar kërkesat e mbrojtjes së dy deputetëve me të cilin ishin refuzuar kërkesat për hedhje të aktakuzës ndaj dy deputetëve.
Lajmin për kallxo.com e konfirmoi avokati i Haxhi Shalës Naser Sopjani.
Kjo është hera e dytë që Apeli vendos lidhur me fatin e kësaj aktakuze pasi që edhe vitin e kaluar e kishte kthyer çështjen në rivendosje ngase atëherë kishte gjetur se themelorja nuk e ka arsyetuar sa duhet vendimin për refuzim të kërkesave për hedhje të aktakuzës.
Katër deputetë të Vetëvendosjes Albin Kurti, Donika Kadaj-Bujupi, Albulena Haxhiu e Faton Topalli u dënuan më 3 janar me burg me kusht për hedhje të gazit në Kuvend.
Një gjykim tjetër për lotsjellësin po i bëhet edhe ish-deputetit tjetër të Vetëvendosjes Fisnik Ismailit.
