Zyra e Kombeve të Bashkuara për Kundër-Terrorizëm (UNOCT) ka lançuar të hënën Rrjetin e Shoqatave të Viktimave të Terrorizmit (VoTAN), me qëllim krijimin e një hapësire të sigurt ku viktimat dhe të mbijetuarit mund të mbështesin njëri-tjetrin, të forcojnë qëndrueshmërinë dhe të angazhohen si avokatë, edukatorë dhe ndërtues paqeje.
Nënsekretari i Përgjithshëm i OKB-së për Kundër-Terrorizëm, Vladimir Voronkov, shprehu solidaritet me të gjitha viktimat, pa dallim kombësie, etnie apo feje, duke vlerësuar guximin dhe qëndrueshmërinë e tyre.
“Në përballje me tragjedi personale të paimagjinueshme, shumë prej tyre kanë zgjedhur të ngrejnë zërin, duke u kthyer në avokatë të fuqishëm për solidaritet dhe tolerancë,” u shpreh Voronkov. Ai theksoi gjithashtu nevojën urgjente dhe shpesh të pambështetur financiarisht të viktimave, duke apeluar për ndihmë ndërkombëtare dhe kombëtare.
