Rreth 1,95 milionë njerëz kanë hyrë në Poloni nga Ukraina që kur Rusia nisi sulmin e saj ndaj vendit.
Aktualisht nuk ka të dhëna zyrtare se sa refugjatë kanë mbetur në Poloni dhe sa kanë udhëtuar në vendet e tjera anëtare të BE-së.
”Gjermania, ndërkohë, ka regjistruar 187 428 ardhje nga Ukraina që nga fillimi i pushtimit rus”, tha të enjten Ministria e Brendshme.
Shumica e tyre ishin gra dhe fëmijë.
Megjithatë, numri aktual ka të ngjarë të jetë shumë më i lartë, pasi Gjermania regjistron vetëm ato të zbuluara nga policia në vende si kufiri gjermano-austriak, në stacione ose në trena.
Gjermania nuk ka kontrolle të rregullta kufitare përgjatë kufijve të saj me shtetet e BE-së si Polonia dhe ukrainasit mund të hyjnë pa vizë.
Është gjithashtu e paqartë se sa njerëz udhëtuan përpara për t’u bashkuar me familjen ose miqtë në vende të tjera.
Ukraina, e cila është vendi më i madh i Evropës për nga madhësia, kishte më shumë se 44 milionë qytetarë përpara se Rusia të niste sulmin e saj në shkallë të plotë më 24 shkurt.
”Më shumë se tre milionë njerëz janë larguar nga Ukraina”, sipas shifrave të OKB-së.
Shumica fillimisht banojnë në vendet fqinje si Polonia, e cila ndan një kufi prej më shumë se 500 kilometrash me Ukrainën. /atsh
