Presidenti i Kroacisë, Zoran Milanoviq tha se Bashkimi Evropian është ndjesi e mirëpritur derisa zgjat, duke shtuar se është e mundur të kesh një jetë të suksesshme dhe dinjitoze edhe pa anëtarësim në Bashkimin Evropian (BE), raporton Anadolu.
Milanoviq e bëri këtë vlerësim pas takimit me presidenten e Maqedonisë së Veriut, Gordana Siljanovska-Davkova, e cila zhvillon një vizitë zyrtare në Zagreb.
“Maqedonia e Veriut vendos vetë se çfarë i shkon më mirë dhe cilën rrugë zgjedh. Kjo, supozoj, është rruga e sigurisë, kënaqësisë, mirëqenies, paqes dhe qetësisë së qytetarëve të saj. Tjetra, përfshirë BE-në dhe NATO-n, është fasadë, një lloj rinovimi energjie. Ajo që bën shtëpinë është struktura, muret mbajtëse dhe struktura e saj”, tha Milanoviq, duke komentuar në mënyrë figurative realitetin politik dhe institucional.
Presidenti kroat theksoi se mendimi i tij nuk përbën këshillë as për Kroacinë as për Maqedoninë e Veriut. “Këto nuk janë këshilla, nuk mund t’i jap as fqinjit përballë, e lëre më një shteti tjetër, këto janë mendimet e mia”, shtoi ai.
Milanoviq tha se BE-ja përfaqëson një mbivendosje, jo ndërtesën e shtetit në vetvete. “BE-ja është ndjesi e mirëpritur derisa zgjat. Nuk kam asnjë iluzion për këtë”, shtoi ai.
Ai potencoi se Maqedonia e Veriut duhet vetë të vlerësojë se çfarë është më mirë për qytetarët e saj, pa manipulime apo mentorim të huaj. “Ka jetë edhe pa BE-në dhe ajo mund të jetë e suksesshme dhe dinjitoze”, tha Milanoviq.
Presidentja Siljanovska-Davkova, nga ana e saj, theksoi se rruga e tyre drejt BE-së është shndërruar në një maratonë, duke bërë thirrje për “kritere të barabarta në rrugën drejt anëtarësimit”.
