Tesla po “tërheq” pothuajse të gjitha 2 milionë makinat e saj në rrugët e SHBA-së për të kufizuar përdorimin e funksionit të saj Autopilot.
Hapi vjen pas një hetimi dyvjeçar nga rregullatorët e sigurisë amerikane për rreth 1000 përplasje në të cilat ishte përfshirë funksioni në fjalë, shkruajnë mediat e huaja, përcjell Telegrafi.
Administrata Kombëtare e Sigurisë së Trafikut në Autostrada tha se sistemi Autopilot mund t’u japë shoferëve një ndjenjë të rreme sigurie dhe të keqpërdoret lehtësisht në situata të caktuara të rrezikshme kur teknologjia e një Tesla mund të mos jetë në gjendje të lëvizë në mënyrë të sigurt në rrugë.
Përditësimi i softuerit do t’u japë drejtuesve të Tesla-s më shumë paralajmërime kur nuk i kushtojnë vëmendje rrugës ndërsa funksioni “Autosteer” i Autopilotit është i aktivizuar.
Këto njoftime do t’u kujtojnë shoferëve që të mbajnë duart në timon dhe t’i kushtojnë vëmendje rrugës, sipas një deklarate nga NHTSA.
Tërheqja u zbulua në një letër drejtuar Tesla-s të postuar nga NHTSA, e cila thoshte se Tesla kishte rënë dakord për përditësimin e softuerit.
