Pjekja e ëmbëlsirave dhe e biskotave në veçanti tingëllon e lehtë, por po aq e lehtë është edhe të gabosh.
Matja e miellit
Ekspertët thonë se nëse e merrni direkt miellin nga qesja duke përdorur lugë, rrezikoni që receta juaj të ketë të paktën 30 përqind më shumë miell seç duhet.
Mënyra më e mirë për t’iu përmbajtur recetës është të përdorni një peshore dixhitale që tregon sasinë e duhur në gramë.
Lloji i gabuar i miellit
Shumica e recetave të ëmbëlsirave kërkojnë miell të tipit 00, që përdoret për shumë gatime.
Nëse përdorni miell për përgatitjen e bukës, ëmbëlsirat ose biskotat do të jenë shumë të forta. Nëse përdorni miell për kek ose byrek, biskotat do të thërrmohen lehtë.
Punimi i tepruar i brumit
Mielli përmban gluten, një proteinë që forcohet shumë gjatë përpunimit të brumit.
Punimi i tepërt i brumit është një gabim që duhet shmangur. Brumi duhet përpunuar pak, saktë dhe me butësi.
Përzierja me dorë e gjalpit dhe sheqerit
Përzierja e sheqerit dhe gjalpit është thelbësore për krijimin e një biskote perfekte. Të dyja nuk duhen përzier me dorë por vetëm me lugën përkatëse.
Gjalpi direkt nga frigoriferi
Nëse gjalpi është shumë i ftohtë, biskotat do të jenë të ngurta. Gjalpi duhet të jetë i freskët por jo i akullt apo shumë i ftohtë.
Ai duhet të qëndrojë në temperaturë ambienti për 15 minuta dhe jo më shumë, përpara se ta përzieni me sheqerin. Gjalpi nuk duhet të jetë as shumë i butë sepse nuk do të lidhet mirë me përbërësit e tjerë.
Pluhuri pjekës i vjetëruar
Pluhuri pjekës mundëson fryrjen e ushqimeve dhe ëmbëlsirave të pjekura. Nëse pluhurin pjekës nuk e keni përdorur për shumë muaj, ai do të humbë fuqinë e vet.
Sigurohuni që pluhuri pjekës të mos jetë i vjetëruar ose të ketë qëndruar në dollap për më shumë se gjashtë muaj.
Tava e zezë
Nëse tava pjekëse ka një ngjyrë të errët ajo do të ndikojë për keq tek biskotat. Ngjyra e zezë përthith më shumë nxehtësi dhe rrjedhimisht do të djegë biskotat më shpejt.
Yndyrosja e tepërt
Shkrirja e gjalpit dhe sheqerit në furrë mundëson që biskotat të përhapen dhe të marrin formën përfundimtare gjatë pjekjes.
Por yndyra e tepërt e pengon këtë. Biskotat duhen pjekur mbi një letër pjekjeje që duhet vendosur në tavë.
Ndezja e furrës
Furra duhet ndezur paraprakisht ndërkohë që jeni duke përgatitur biskotat. Në temperaturën e duhur, biskotat piqen ashtu siç duhet.
Hapja e shpeshtë e furrës
Furra nuk duhet hapur shpesh ndërkohë që piqni biskotat. Sa herë që ajo hapet, ka luhatje temperature që ndikon në pjekjen e biskotave.
