Ratko Mlladiç, i njohur edhe si “Kasapi i Bosnjës”, u shtrua në spital pasi shëndeti i tij u përkeqësua në burgun e Holandës. Sipas raportimeve në mediat e huaja, i dënuari për krime lufte ndodhet në gjendje kritike për jetën.
“Ai u dërgua në spitalin e burgut për shkak të dobësisë së përgjithshme, inflamacionit të mushkërive dhe ankesave të zemrës. Kontrollet vazhdojnë. Ne u informuam se rezultatet do të dihen më së voni të hënën,”- tha djali i tij, Darko Mlladiç.
U pretendua gjithashtu se Mlladiç u infektua me COVID-19 në fillim të gushtit dhe se trajtimi në burg ishte i ngadaltë dhe i pamjaftueshëm. Mlladiç ekzekutoi gjenocidin dhe krimet më të mirëdokumentuara kundër njerëzimit në Evropë pas Luftës së Dytë Botërore.
Gjykata e OKB-së në Hagë dënoi ish-komandantin serb të Bosnjës Mlladiç me burgim të përjetshëm për përhapjen e terrorit midis civilëve në kryeqytetin Sarajevë dhe pjesë të tjera të Bosnje dhe Hercegovinës. Më shumë se 8,000 burra dhe djem myslimanë boshnjakë u vranë kur forcat serbe të Bosnjës sulmuan qytetin lindor të Srebrenicës në korrik 1995, pavarësisht nga prania e trupave paqeruajtëse holandeze.
