Bashkimi Evropian ka bërë thirrje për ndalje urgjente të luftimeve në Liban, duke shprehur shqetësim për pasojat ndaj civilëve, transmeton Anadolu.
“Ne bëjmë gjithashtu thirrje për një ndërprerje urgjente të luftimeve në Liban, të cilat po shkaktojnë një kosto të rëndë mbi civilët”, tha Përfaqësuesja e Lartë e BE-së për Politikë të Jashtme, Kaja Kallas, në një deklaratë të publikuar vonë të enjten.
Ajo u bëri thirrje të gjitha palëve që “të respektojnë plotësisht armëpushimin në të gjithë rajonin”.
Kallas shtoi se liria e lundrimit si dhe kalimi i lirë dhe i sigurt përmes Ngushticës së Hormuzit, duhet të sigurohen në përputhje me të drejtën ndërkombëtare.
Ajo mirëpriti armëpushimin e arritur midis SHBA-së dhe Iranit dhe përgëzoi Pakistanin dhe partnerë të tjerë rajonalë për përpjekjet e tyre ndërmjetësuese.
“Të gjitha palët duhet të respektojnë të drejtën ndërkombëtare humanitare dhe të mbrojnë civilët dhe infrastrukturën civile, paqeruajtësit e OKB-së dhe personelin humanitar”, tha ajo.
Duke e quajtur diplomacinë çelës për zgjidhjen e çështjeve të mbetura, ajo u bëri thirrje palëve të vazhdojnë angazhimin me mirëbesim drejt një marrëveshjeje të qëndrueshme.
“Tani është koha për të hartuar strategji gjithëpërfshirëse për paqe të qëndrueshme në të gjithë Lindjen e Mesme”, tha ajo.
– Izraeli intensifikon sulmet ndaj Libanit
Zhvillimet e fundit erdhën ndërsa Izraeli ka intensifikuar sulmet ndaj Libanit pavarësisht përpjekjeve diplomatike të lidhura me një armëpushim dyjavor të shpallur të martën nga SHBA-ja dhe Irani, i ndërmjetësuar nga Pakistani.
Ndërsa ndërmjetësit pakistanezë dhe Teherani thanë se armëpushimi përfshinte edhe Libanin, Washingtoni dhe Tel Avivi e mohuan këtë.
Kryeministri izraelit Benjamin Netanyahu tha të enjten se “nuk ka armëpushim në Liban”, pavarësisht se urdhëroi fillimin e negociatave të drejtpërdrejta me Bejrutin.
Ushtria izraelite ka intensifikuar sulmet në mbarë Libanin që nga e mërkura, duke vrarë të paktën 303 persona dhe duke plagosur 1.150 të tjerë, sipas Mbrojtjes Civile të Libanit.
Ofensiva e zgjeruar izraelite në Liban që nga 2 marsi ka vrarë 1.888 persona dhe ka plagosur 6.092 të tjerë, sipas Ministrisë së Shëndetësisë së Libanit.
